2 Samuel 17
1ⲡⲉϫⲉⲁⲭⲓⲇⲟⲫⲉⲗ ⲛⲁⲃⲉⲥⲥⲁⲗⲱⲙ ϫⲉ ⲧⲁⲥⲱⲧⲡ ⲛⲁⲓ ⲙⲙⲛⲧⲥⲛⲟⲟⲩⲥ ⲛϣⲟ ⲛⲣⲱⲙⲉ ⲛⲧⲁⲧⲱⲟⲩⲛ ⲛⲧⲁⲡⲱⲧ ⲛⲥⲁ ⲇ︤ⲁ︦ⲇ︥ ⲛⲧⲉⲩϣⲏ 2ⲛⲧⲁⲡⲱϩⲧ ⲉϫⲱϥ ⲁⲩⲱ ⲛⲧⲟϥ ⲉⲓⲛⲁⲧⲁϩⲟϥ ⲉϥϩⲟⲥⲉ ⲉⲛϥⲙⲏⲣ ⲁⲛ ϩⲛ ⲛⲉϥϭⲓϫ ⲛⲧⲁⲑⲉⲣϣⲁϥ ⲉⲙⲁⲧⲉ ⲛϥⲧⲱⲟⲩⲛ ⲛϥⲡⲱⲧ ⲛⲧⲟϥ ⲁⲩⲱ ⲡⲙⲏⲏϣⲉ ⲧⲏⲣϥ ⲉⲧⲛⲙⲙⲁϥ ⲁⲩⲱ ⲛⲧⲁⲣⲁϩⲧ ⲡⲣⲣⲟ ⲙⲁⲩⲁⲁϥ 3ⲛⲧⲁⲕⲧⲉⲡⲗⲁⲟⲥ ⲧⲏⲣϥ ⲉⲣⲁⲧⲕ ⲛⲑⲉ ⲛⲧϣⲉⲗⲉⲉⲧ ⲉϣⲁⲥⲕⲧⲟⲥ ⲉⲣⲁⲧϥ ⲙⲡⲉⲥϩⲁⲓ ⲡⲗⲏⲛ ⲧⲉⲯⲩⲭⲏ ⲛⲟⲩⲣⲱⲙⲉ ⲛⲟⲩⲱⲧ ⲧⲉⲧⲉⲕⲕⲱⲧⲉ ⲛⲥⲱⲥ ⲛⲧⲁⲕ ⲁⲩⲱ ⲡⲗⲁⲟⲥ ⲧⲏⲣϥ ⲟⲩⲛ ⲟⲩⲉⲓⲣⲏⲛⲏ ⲛⲁϣⲱⲡⲉ ⲛⲁϥ 4ⲡϣⲁϫⲉ ⲇⲉ ⲛⲉϥⲥⲟⲩⲧⲱⲛ ⲛⲁϩⲣⲁϥ ⲛⲁⲃⲉⲥⲥⲁⲗⲱⲙ ⲁⲩⲱ ⲛⲁϩⲣⲁⲩ ⲛⲛⲉⲡⲣⲉⲥⲃⲩⲧⲉⲣⲟⲥ ⲧⲏⲣⲟⲩ ⲙⲡⲓ︤ⲏ︦ⲗ︥ 5ⲡⲉϫⲉⲁⲃⲉⲥⲥⲁⲗⲱⲙ ⲇⲉ ϫⲉ ⲙⲟⲩⲧⲉ ϩⲱⲱϥ ⲉⲭⲟⲩⲥⲓ ⲡϣⲏⲣⲉ ⲛⲁⲣⲁⲭⲓ ⲛⲧⲉⲛⲥⲱⲧⲙ ⲉⲡϣⲁϫⲉ ϩⲱⲱϥ ⲉⲧϩⲛⲧⲉϥⲧⲁⲡⲣⲟ 6ⲁⲩⲱ ⲭⲟⲩⲥⲉⲓ ⲁϥⲃⲱⲕ ⲉϩⲟⲩⲛ ϣⲁ ⲁⲃⲉⲥⲥⲁⲗⲱⲙ ⲡⲉϫⲉⲁⲃⲉⲥⲥⲁⲗⲱⲙ ⲛⲁϥ ϫⲉ ⲉⲛⲉⲧⲁⲉⲓⲣⲉ ⲕⲁⲧⲁ ⲡⲉⲓϣⲁϫⲉ ⲛⲧⲁⲁⲭⲓⲇⲟⲫⲉⲗ ϫⲟⲟϥ ⲉϣⲱⲡⲉ ⲇⲉ ⲙⲙⲟⲛ ⲉⲓⲉ ϣⲁϫⲉ ⲛⲧⲟⲕ 7ⲡⲉϫⲉⲭⲟⲩⲥⲉⲓ ⲛⲁⲃⲉⲥⲥⲁⲗⲱⲙ ϫⲉ ⲛⲁⲛⲟⲩ ⲡⲉⲓϣⲁϫⲛⲉ ⲁⲛ ⲛⲧⲁⲁⲭⲓⲇⲟⲫⲉⲗ ϣⲟϫⲛⲉ ⲙⲙⲟϥ ⲙⲡⲉⲓⲥⲟⲡ 8ⲁϥⲟⲩⲱϩ ⲉⲧⲟⲟⲧϥ ⲟⲛ ⲛϭⲓ ⲭⲟⲩⲥⲓ ⲉϥϫⲱ ⲙⲙⲟⲥ ⲟⲛ ϫⲉ ⲛⲧⲟⲕ ⲕⲥⲟⲟⲩⲛ ⲙⲡⲉⲕⲉⲓⲱⲧ ⲙⲛ ⲛⲉϥⲕⲉⲣⲱⲙⲉ ϫⲉ ϩⲛϫⲱⲱⲣⲉ ⲛⲉ ⲉⲙⲁⲧⲉ ⲁⲩⲱ ⲥⲉⲛⲁϣⲧ ϩⲛ ⲧⲉⲩⲯⲩⲭⲏ ⲛⲑⲉ ⲛⲟⲩⲁⲣⲝ ⲉⲁⲩϥⲓ ⲛⲛⲉⲥϣⲏⲣⲉ ϩⲛ ⲧⲥⲱϣⲉ ⲁⲩⲱ ⲛⲑⲉ ⲛⲟⲩⲣⲓⲣ ⲛϩⲟⲟⲩⲧ ⲉϥⲛⲁϣⲧ ϩⲛ ⲟⲩⲙⲁ ⲛϣⲏⲛ ⲁⲩⲱ ⲡⲉⲕⲉⲓⲱⲧ ⲟⲩⲣⲉϥⲙⲓϣⲉ ⲡⲉ ⲉϥⲛⲁϯϭⲟⲧⲡⲥ ⲁⲛ ⲉⲡⲗⲁⲟⲥ 9ⲉⲓⲥ ϩⲏⲏⲧⲉ ⲛⲧⲟϥ ϥϩⲏⲡ ϩⲛ ⲟⲩⲁ ⲛⲛⲉⲃⲟⲩⲛⲟⲥ ⲏ ϩⲛ ⲟⲩⲁ ⲛⲛⲙⲁ ⲛⲗⲱϭⲉ ⲁⲩⲱ ϩⲙ ⲡⲧⲣⲉϥⲉⲓ ⲉϩⲣⲁⲓ ⲉϫⲱⲟⲩ ⲛϣⲟⲣⲡ ϥⲛⲁⲡⲁⲧⲁⲥⲥⲉ ⲙⲙⲟⲟⲩ ⲁⲩⲱ ⲛϥⲥⲱⲧⲙ ⲛϭⲓ ⲡⲉⲧⲛⲁⲥⲱⲧⲙ ⲛϥϫⲟⲟⲥ ϫⲉ ⲁⲩⲣⲁϩⲧⲥ ϣⲱⲡⲉ ⲛⲥⲁ ⲡⲗⲁⲟⲥ ⲉⲧⲟⲩⲏϩ ⲛⲥⲁ ⲁⲃⲉⲥⲥⲁⲗⲱⲙ 10ⲁⲩⲱ ⲛⲧⲟϥ ⲡⲉⲕⲉⲓⲱⲧ ⲟⲩⲣⲱⲙⲉ ⲡⲉ ⲛϫⲱⲱⲣⲉ ⲉⲣⲉⲡⲉϥϩⲏⲧ ⲟ ⲛⲑⲉ ⲙⲡϩⲏⲧ ⲙⲡⲙⲟⲩⲓ ϩⲛ ⲟⲩⲱⲛ ⲉϥϣⲁⲛⲟⲩⲱⲛ ⲁⲩⲱ ⲡⲓ︤ⲏ︦ⲗ︥ ⲧⲏⲣϥ ⲥⲟⲟⲩⲛ ϫⲉ ⲟⲩⲇⲩⲛⲁⲧⲟⲥ ⲡⲉ ⲡⲉⲕⲉⲓⲱⲧ ⲁⲩⲱ ⲛⲕⲉⲣⲱⲙⲉ ⲉⲧⲛⲙⲙⲁϥ ϩⲉⲛⲣⲱⲙⲉ ⲛⲉ ⲛϫⲱⲱⲣⲉ 11ⲡⲁϣⲟϫⲛⲉ ϭⲉ ⲁⲛⲟⲕ ⲉⲓϯ ⲙⲙⲟϥ ϩⲓⲛⲁⲓ ⲁⲩⲱ ϩⲛ ⲟⲩⲥⲱⲟⲩϩ ϥⲛⲁⲥⲱⲟⲩϩ ⲉⲣⲁⲧⲕ ⲛϭⲓ ⲡⲗⲁⲟⲥ ⲧⲏⲣϥ ⲛϫⲓⲛ ⲇⲁⲛ ϣⲁ ⲃⲏⲣⲥⲁⲃⲉⲉ ⲉϥⲟϣ ⲛⲑⲉ ⲙⲡϣⲱ ⲉⲧⲡⲟⲣϣ ⲉⲃⲟⲗ ⲉϫⲙ ⲡⲉⲥⲡⲟⲧⲟⲩ ⲛⲑⲁⲗⲁⲥⲥⲁ ⲉⲩⲁϣⲏ ⲁⲩⲱ ⲡⲉⲕϩⲟ ϥⲛⲁϣⲱⲡⲉ ⲉϥϩⲁⲉⲟⲟⲩ ϩⲛ ⲧⲉⲩⲙⲏⲧⲉ 12ⲁⲩⲱ ⲧⲉⲛⲛⲁⲉⲓ ⲡⲉ ⲉϩⲣⲁⲓ ⲉϫⲱϥ ϩⲛ ⲟⲩⲁ ⲛⲛⲙⲁ ⲉⲧⲉⲛⲛⲁⲧⲁϩⲟϥ ⲛϩⲏⲧϥ ⲁⲩⲱ ⲧⲉⲛⲛⲁϭⲱ ϩⲓⲣⲱϥ ⲛⲑⲉ ⲛϯⲱⲧⲉ ⲉϣⲁⲥⲉⲓ ⲉϫⲙ ⲡⲕⲁϩ ⲛⲧⲉⲛⲧⲙⲕⲁⲟⲩⲁ ⲛϩⲏⲧⲟⲩ ⲉⲥⲉⲉⲡⲉ ⲟⲩⲇⲉ ⲛⲧⲟϥ ⲟⲩⲇⲉ ⲛⲕⲉⲣⲱⲙⲉ ⲉⲧⲛⲙⲙⲁϥ 13ⲉϥϣⲁⲛⲡⲱⲧ ⲇⲉ ⲉϩⲟⲩⲛ ⲉⲩⲡⲟⲗⲓⲥ ⲡⲓ︤ⲏ︦ⲗ︥ ⲧⲏⲣϥ ⲛⲁⲥⲉⲣⲛⲟⲩϩ ⲉⲃⲟⲗ ⲉⲧⲡⲟⲗⲓⲥ ⲉⲧⲙⲙⲁⲩ ⲛⲧⲉⲛⲥⲟⲕⲥ ⲉⲃⲟⲗ ⲉⲡⲉⲭⲉⲓⲙⲁⲣⲣⲟⲥ ⲛⲧⲉⲛⲧⲙⲕⲁⲟⲩⲱⲛⲉ ⲛⲟⲩⲱⲧ ⲛϩⲏⲧⲥ 14ⲡⲉϫⲉⲁⲃⲉⲥⲥⲁⲗⲱⲙ ⲇⲉ ⲛⲛⲉⲣⲱⲙⲉ ⲧⲏⲣⲟⲩ ⲙⲡⲓ︤ⲏ︦ⲗ︥ ϫⲉ ⲛⲁⲛⲟⲩ ⲡϣⲁϫⲉ ⲛⲭⲟⲩⲥⲓ ⲡϣⲏⲣⲉ ⲛⲁⲣⲁⲭⲓ ⲉϩⲟⲩⲉ ⲉⲡϣⲟϫⲛⲉ ⲛⲁⲭⲓⲇⲟⲫⲉⲗ ⲁⲩⲱ ⲡϫⲟⲉⲓⲥ ⲁϥⲟⲩⲉϩⲥⲁϩⲛⲉ ⲉϫⲱⲱⲣⲉ ⲉⲃⲟⲗ ⲙⲡϣⲟϫⲛⲉ ⲉⲧⲛⲁⲛⲟⲩϥ ⲛⲁⲭⲓⲇⲟⲫⲉⲗ ϫⲉⲕⲁⲥ ⲉⲣⲉⲡϫⲟⲉⲓⲥ ⲉⲓⲛⲉ ⲉϫⲛ ⲁⲃⲉⲥⲥⲁⲗⲱⲙ ⲛⲛⲉⲡⲉⲑⲟⲟⲩ ⲧⲏⲣⲟⲩ 15ⲭⲟⲩⲥⲓ ⲇⲉ ⲡϣⲏⲣⲉ ⲛⲁⲣⲁⲭⲓ ⲡⲉϫⲁϥ ⲛⲥⲁⲇⲱⲕ ⲙⲛ ⲁⲃⲓⲁⲑⲁⲣ ⲛⲉⲟⲩⲏⲏⲃ ϫⲉ ⲉⲓⲥ ⲑⲏ ⲙⲛ ⲑⲏ ⲛⲧⲁϥϯϣⲟϫⲛⲉ ⲛϭⲓ ⲁⲭⲓⲇⲟⲫⲉⲗ ⲛⲁⲃⲉⲥⲥⲁⲗⲱⲙ ⲙⲛ ⲛⲉⲡⲣⲉⲥⲃⲩⲧⲉⲣⲟⲥ ⲙⲡⲓ︤ⲏ︦ⲗ︥ ⲉⲓⲥ ⲧⲁϩⲉ ϩⲱ ⲛⲧⲁⲓⲥⲩⲙⲃⲟⲩⲗⲉⲩⲉ 16ⲧⲉⲛⲟⲩ ϭⲉ ϫⲟⲟⲩ ⲧⲁⲭⲏ ⲛⲧⲉⲧⲛⲧⲁⲙⲉⲇ︤ⲁ︦ⲇ︥ ⲉⲧⲉⲧⲛϫⲱ ⲙⲙⲟⲥ ⲛⲁϥ ϫⲉ ⲙⲡⲣϭⲱ ϩⲛ ϯⲟⲩϣⲏ ϩⲛ ⲁⲣⲁⲃⲱⲑ ⲛⲧⲉ ⲧⲉⲣⲏⲙⲟⲥ ⲁⲗⲗⲁ ⲧⲱⲟⲩⲛ ⲛⲅⲡⲱⲱⲛⲉ ⲉⲃⲟⲗ ⲧⲁⲭⲏ ⲙⲏⲡⲟⲧⲉ ⲛϥⲧⲱⲟⲩⲛ ⲉϫⲙ ⲡⲣⲣⲟ ⲁⲩⲱ ⲡⲕⲉⲗⲁⲟⲥ ⲉⲧⲛⲙⲙⲁϥ 17ⲓⲱⲛⲁⲑⲁⲛ ⲇⲉ ⲁⲩⲱ ⲁⲭⲓⲙⲁⲁⲥ ⲛⲉⲩⲁϩⲉⲣⲁⲧⲟⲩ ϩⲓϫⲛ ⲧⲡⲩⲗⲏ ⲛϩⲣⲱⲅⲏⲗ ⲑⲙϩⲁⲗ ⲇⲉ ⲁⲥⲡⲱⲧ ⲁⲥⲧⲁⲙⲟⲟⲩ ⲛⲧⲟⲟⲩ ϩⲱⲟⲩ ⲁⲩⲡⲱⲧ ⲁⲩⲧⲁⲙⲉⲡⲣⲣⲟ ⲇ︤ⲁ︦ⲇ︥ ϫⲉ ⲙⲡⲟⲩⲉϣⲟⲩⲱⲛϩ ⲉⲃⲟⲗ ⲉⲧⲣⲉⲩⲣⲡϩⲟⲩⲛ ⲛⲧⲡⲩⲗⲏ 18ⲁϥⲛⲁⲩ ⲇⲉ ⲉⲣⲟⲟⲩ ⲛϭⲓ ⲟⲩϣⲏⲣⲉ ϣⲏⲙ ⲁϥⲃⲱⲕ ⲁϥⲧⲁⲙⲉⲁⲃⲉⲥⲥⲁⲗⲱⲙ ⲛⲧⲟⲟⲩ ⲇⲉ ⲙⲡⲉⲥⲛⲁⲩ ⲁⲩⲡⲱⲧ ⲧⲁⲭⲏ ⲁⲩⲃⲱⲕ ⲉϩⲟⲩⲛ ⲉⲡⲏⲓ ⲛⲟⲩⲣⲱⲙⲉ ϩⲛ ⲃⲁⲟⲩⲣⲓⲙ ⲛⲧⲟϥ ⲇⲉ ⲛⲉⲟⲩⲛⲧϥⲟⲩϣⲏⲓ ⲙⲙⲁⲩ ϩⲙ ⲡⲉϥⲟϩⲉ ⲁⲩⲃⲱⲕ ⲉⲡⲉⲥⲏⲧ ⲉⲣⲟϥ 19ⲁⲩⲱ ⲧⲉⲥϩⲓⲙⲉ ⲙⲡⲣⲱⲙⲉ ⲁⲥⲕⲱ ⲛⲟⲩϩⲟⲃⲥ ⲉϫⲛ ⲧⲧⲁⲡⲣⲟ ⲙⲡϣⲏⲓ ⲁⲩⲱ ⲁⲥⲡⲱⲣϣ ⲉⲃⲟⲗ ⲉϫⲱϥ ⲛⲟⲩⲁⲣⲁⲫⲱⲑ ⲉⲧⲉϩⲉⲛⲛⲕⲁ ⲛⲟⲩⲱⲙ ⲛⲉ ⲁⲩⲱ ⲙⲡⲉϩⲱⲃ ⲟⲩⲱⲛϩ ⲉⲃⲟⲗ 20ⲛϩⲙϩⲁⲗ ⲇⲉ ⲛⲁⲃⲉⲥⲥⲁⲗⲱⲙ ⲁⲩⲉⲓ ⲉⲣⲁⲧⲥ ⲛⲧⲉⲥϩⲓⲙⲉ ⲉⲡⲉⲥⲏⲓ ⲡⲉϫⲁⲩ ⲛⲁⲥ ϫⲉ ⲉϥⲧⲱⲛ ⲁⲭⲓⲙⲁⲁⲥ ⲙⲛ ⲓⲱⲛⲁⲑⲁⲛ ⲧⲉⲥϩⲓⲙⲉ ⲇⲉ ⲡⲉϫⲁⲥ ⲛⲁⲩ ϫⲉ ⲁⲩⲥⲓⲛⲉ ⲙⲡⲟⲟⲩ ϩⲁⲑⲏ ⲛⲟⲩⲕⲟⲩⲓ ⲁⲩϯⲟⲩⲟⲓ ⲇⲉ ⲛⲥⲱⲟⲩ ⲙⲡⲟⲩϩⲉ ⲉⲣⲟⲟⲩ ⲁⲩⲱ ⲁⲩⲕⲧⲟⲟⲩ ⲉϩⲣⲁⲓ ⲉⲑⲓ︤ⲗ︦ⲏ︦ⲙ︥ 21ⲁⲥϣⲱⲡⲉ ⲇⲉ ⲙⲛⲛⲥⲁ ⲉⲧⲣⲉⲛⲏ ⲃⲱⲕ ⲛⲁⲓ ϩⲱⲟⲩ ⲁⲩⲉⲓ ⲉϩⲣⲁⲓ ϩⲙ ⲡϣⲏⲓ ⲁⲩⲡⲱⲧ ⲁⲩⲧⲁⲙⲉⲡⲣⲣⲟ ⲇ︤ⲁ︦ⲇ︥ ⲁⲩⲱ ⲡⲉϫⲁⲩ ⲉϩⲟⲩⲛ ϩⲛ ⲇ︤ⲁ︦ⲇ︥ ϫⲉ ⲧⲟⲩⲛⲧⲏⲩⲧⲛ ⲧⲉⲛⲟⲩ ⲛⲧⲉⲧⲛϫⲓⲟⲟⲣ ⲙⲡⲙⲟⲟⲩ ϫⲉ ⲉⲓⲥ ⲑⲏ ⲧⲉ ⲧⲁⲓ ⲛⲧⲁϥϯϣⲟϫⲛⲉ ⲉⲧⲃⲉⲧⲏⲩⲧⲛ ⲛϭⲓ ⲁⲭⲓⲇⲟⲫⲉⲗ 22ⲁⲩⲱ ⲇⲁⲩⲉⲓⲇ ⲁϥⲧⲱⲟⲩⲛ ⲙⲛ ⲡⲗⲁⲟⲥ ⲧⲏⲣϥ ⲉⲧⲛⲙⲙⲁϥ ⲁⲩϫⲓⲟⲟⲣ ⲙⲡⲓⲟⲣⲇⲁⲛⲏⲥ ϣⲁ ⲡⲛⲁⲩ ⲛⲧⲉⲡⲟⲩⲟⲉⲓⲛ ⲉⲓ ⲉϩⲣⲁⲓ ⲙⲡⲉⲟⲩⲁ ⲛⲟⲩⲱⲧ ϭⲱ ⲉⲡⲁϩⲟⲩ ⲛϩⲏⲧⲟⲩ ⲉⲙⲡⲉϥϫⲓⲟⲟⲣ ⲙⲡⲓⲟⲣⲇⲁⲛⲏⲥ 23ⲁⲩⲱ ⲁⲭⲓⲧⲟⲫⲉⲗ ⲛⲧⲉⲣⲉϥⲛⲁⲩ ϫⲉ ⲙⲡⲉⲡϣⲟϫⲛⲉ ⲛⲧⲁϥⲁⲁϥ ϣⲱⲡⲉ ⲁϥϩⲉⲕⲧⲉϥⲉⲱ ⲁϥⲧⲱⲟⲩⲛ ⲁϥⲡⲱⲧ ⲉϩⲣⲁⲓ ⲉⲡⲉϥⲏⲓ ⲉⲧⲉϥⲡⲟⲗⲓⲥ ⲁⲩⲱ ⲛⲧⲉⲣⲉϥϩⲱⲛ ⲉⲧⲟⲟⲧⲟⲩ ⲛⲛⲁⲡⲉϥⲏⲓ ϩⲛ ⲛⲉⲛⲧⲁϥϫⲟⲟⲩ ⲁϥⲟϫⲧϥ ⲁϥⲙⲟⲩ ⲁⲩⲱ ⲁⲩⲧⲟⲙⲥϥ ϩⲙ ⲡⲧⲁⲫⲟⲥ ⲙⲡⲉϥⲉⲓⲱⲧ 24ⲁⲩⲱ ⲇ︤ⲁ︦ⲇ︥ ⲁϥⲉⲓ ⲉϩⲣⲁⲓ ⲉⲙⲁⲛⲁⲓⲙ ⲁⲩⲱ ⲁⲃⲉⲥⲥⲁⲗⲱⲙ ⲁϥϫⲓⲟⲟⲣ ⲙⲡⲓⲟⲣⲇⲁⲛⲏⲥ ⲛⲧⲟϥ ⲁⲩⲱ ⲡⲗⲁⲟⲥ ⲧⲏⲣϥ ⲁϥⲉⲓ ⲉϩⲣⲁⲓ ⲛⲙⲙⲁϥ 25ⲁⲙⲉⲥⲥⲁⲓ ⲇⲉ ⲁϥⲕⲁⲑⲓⲥⲧⲁ ⲙⲙⲟϥ ⲛϭⲓ ⲁⲃⲉⲥⲥⲁⲗⲱⲙ ⲉⲡⲙⲁ ⲛⲓⲱⲁⲃ ⲉⲧⲣⲉϥϭⲱ ⲉϫⲙ ⲡⲉϥⲙⲏⲏϣⲉ ⲁⲙⲉⲥⲥⲁⲓ ⲇⲉ ⲡϣⲏⲣⲉ ⲡⲉ ⲛⲟⲩⲣⲱⲙⲉ ⲉⲡⲉϥⲣⲁⲛ ⲡⲉ ⲓⲟⲑⲟⲣ ⲡⲓⲥⲣⲁⲏⲗⲓⲧⲏⲥ ⲡⲁⲓ ⲁϥⲃⲱⲕ ⲉϩⲟⲩⲛ ϣⲁ ⲁⲃⲓⲕⲓⲁ ⲧϣⲉⲉⲣⲉ ⲛⲛⲁⲁⲥ ⲡⲥⲟⲛ ⲛⲥⲁⲣⲟⲩⲉⲓⲁ ⲧⲙⲁⲁⲩ ⲛⲓⲱⲁⲃ 26ⲁⲩⲱ ⲡⲓ︤ⲏ︦ⲗ︥ ⲧⲏⲣϥ ⲙⲛ ⲁⲃⲉⲥⲥⲁⲗⲱⲙ ⲁⲩⲧⲁⲁⲩ ⲉϩⲣⲁⲓ ⲉⲡⲕⲁϩ ⲛⲅⲁⲗⲁⲁⲇ 27ⲁⲥϣⲱⲡⲉ ⲇⲉ ⲛⲧⲉⲣⲉⲇ︤ⲁ︦ⲇ︥ ⲉⲓ ⲉϩⲣⲁⲓ ⲉⲙⲁⲛⲁⲓⲙ ⲉⲡⲙⲁ ⲉⲧⲉⲣⲉⲟⲩⲉⲥⲃⲓ ⲛϩⲏⲧϥ ⲡϣⲏⲣⲉ ⲛⲛⲁⲁⲥ ⲉⲃⲟⲗ ϩⲛ ϩⲣⲁⲃⲃⲁⲑ ⲡⲕⲁϩ ⲛⲛⲉϣⲏⲣⲉ ⲛⲁⲙⲙⲱⲛ ⲙⲁⲭⲓⲣ ⲡϣⲏⲣⲉ ⲛⲁⲙⲓⲏⲗ ⲡⲉ ⲉⲃⲟⲗ ϩⲛ ⲗⲱⲇⲁⲃⲁⲣ ⲁⲩⲱ ⲃⲉⲍⲇⲉⲗⲗⲓ ⲡⲅⲁⲗⲁⲁⲇⲓⲧⲏⲥ ⲡⲉ ⲉⲃⲟⲗ ϩⲛ ϩⲣⲱⲅⲉⲗⲗⲓⲙ 28ⲁⲩⲉⲓⲛⲉ ⲙⲙⲏⲧⲉ ⲛⲕⲓⲧⲉ ⲙⲛ ϩⲉⲛⲁⲙⲫⲓⲧⲁⲡⲟⲥ ⲁⲩⲱ ⲙⲏⲧ ⲛⲭⲁⲗⲕⲓⲟⲛ ⲙⲛ ϩⲉⲛⲥⲕⲉⲩⲏ ⲛϣⲁϣⲟⲩ ⲛⲏⲣⲡ ⲁⲩⲱ ϩⲉⲛⲥⲟⲩⲟ ⲙⲛ ⲟⲩⲉⲓⲱⲧ ⲙⲛ ⲟⲩⲛⲟⲉⲓⲧ ⲙⲛ ⲟⲩϩⲛⲁⲁⲩ ⲛⲉⲗⲉⲗϣⲱⲟⲩⲉ ⲙⲛ ϩⲉⲛⲕⲉⲁⲙⲟⲥ ⲁⲩⲱ ⲟⲩⲁⲣϣⲓⲛ 29ⲙⲛ ⲟⲩⲉⲃⲓⲱ ⲁⲩⲱ ⲟⲩⲥⲟⲉⲓⲣⲉ ⲙⲛ ϩⲉⲛⲉⲥⲟⲟⲩ ⲁⲩⲱ ⲥⲁⲡⲫⲟⲧ ⲛⲛⲉϩ ⲉⲧⲉϩⲉⲛⲙⲁⲥⲉ ⲛⲉ ⲁⲩϫⲓⲧⲟⲩ ⲉϩⲟⲩⲛ ⲛⲇⲁⲩⲉⲓⲇ ⲁⲩⲱ ⲙⲡⲗⲁⲟⲥ ⲉⲧⲛⲙⲙⲁϥ ⲉⲧⲣⲉⲩⲟⲩⲱⲙ ⲉⲃⲟⲗ ϫⲉ ⲁⲩϫⲟⲟⲥ ϫⲉ ⲉⲓⲥ ⲡⲗⲁⲟⲥ ϩⲕⲁⲉⲓⲧ ⲁⲩⲱ ϥⲟⲃⲉ ⲉϥϣⲟⲥⲙ ϩⲛ ⲧⲉⲣⲏⲙⲟⲥ
Copyright information for
CopSahBible2